სათავგადასავლო კლუბი "ჯომარდი"

საქართველოში სათავგადასავლო ტურნირის (სირბილი, ველო, ჯომარდი) ჩატარების იდეა დიდი ხანია არსებობდა. თავად იდეა არ არის ახალი – ევროპაში და ამერიკის კონტინენტზე უკვე მრავლად იმართება მსგავსი შეჯიბრებები.

საქართველოში კი პირველი შეჯიბრისთვის, გარდა გამოუცდელობისა და ორგანიზაციული სირთულეებისა, მთავარი პრობლემა ფინანსების მოძიება იყო.

ეს პრობლემა გადაიჭრა შვეიცარიის განვითარების სააგენტოს (SDS)-ის დახმარებით, რომელიც გახდა ტურნირის გენერალური სპონსორი. ტურიზმის ინფრასტრუქრურის განვითარებისთვის სააგენტო უკვე რამდენიმე წელია აფინანსებდა პროექტებს მესხეთ-ჯავახეთში და ეს ტურნირი ზუსტად მოერგო ამ მიმართულებას. შეჯიბრის ორგანიზატორი იყო საქართველოს ტურიზმის ასოციაცია.

ვარძიის რეგიონი ალბათ იდეალურია ამ ტიპის ტურნირის ჩასატარებლად. აქ საუკეთესო პირობებია სამივე სახეობისთვის.
საორგანიზაციო კომიტეტმა (შტეფან შულაინი, მიშა მინდიაშვილი, ვატო ასათაშვილი, სოსო მექვევრიშვილი, თამუნა ჯიშკარიანი, მამუკა ბურდული) რამდენიმე გასვლა მოაწყო მესხეთში და საბოლოოდ შეჯიბრის ჩასატარებლად შეირჩა ვარძია-თმოგვის მონაკვეთი. პირველი მონაკვეთი - მორბენლებისთვის - ვარძიიდან თმოგვის ციხემდე. დისტანციის სიგრძე 6.5 კმ, სადაც ყველაზე რთული ციცაბო აღმართია თმოგვის ციხესთან.
მეორე მონაკვეთი (თმოგვის ციხე – სოფ. ნოქალაქევი – სოფ. თმოგვი – ვარძია), რომელიც ველომრბოლელებისთვის შეირჩა არის 11.5 კმ. აქ განსაკუთრებული სირთულის მონაკვეთები არ არის.

ჯომარდის დისტანცია სულ 1.5 კმ-ია.

გუნდების შემადგენლობაში 6 წევრი უნდა ყოფილიყო. მათგან სამი მორბენალი, სამი ველომრბოლელი და ექვსივე ბოლოს ჯომარდელი ხდებოდა.
თავიდან დაგეგმილი იყო 12 გუნდის მონაწილეობა, თუმცა, ორგანიზატორებისთვის საკმაოდ მოულოდნელად, მსურველი გუნდების რაოდენობა 20-მდე გაიზარდა. საბოლოოდ გადაწყდა, შეჯიბრში 16 გუნდის დაშვება.

ტურნირის ფორმატი შემდეგნაირი იყო: გუნდები კენჭისყრით დაყოფილ იქნენ 4 ჯგუფად (თითოეულში 4 გუნდი). ჯგუფებში გამარჯვებული 4 გუნდი ერთმანეთს დიდ ფინალში ხვდებოდნენ. დიდი ფინალი მხოლოდ საჯომარდო დისტანცია იყო.

დიდ “საჯომარდო” ფინალში საკმაოდ დამაჯერებლად გაიმარჯვა ადგილობრივმა ასპინძის გუნდმა.

გადაწყდა, რომ ტურნირმა მიიღოს ტრადიციული სახე და ჩატარდეს ყოველ წელს - გაზაფხულის ბოლო ან ზაფხულის პირველ კვირას.

2010 წელს ტურნირი გაიმართება 5-6  ივნისს და მისი ორგანიზატორი ისევ საქართველოს ტურიზმის ასოციაცია იქნება.